إزاي أتعامل مع طلاق أو إنفصال أهلي ؟

*هذا المقال مخصص ضمن برنامج "جرب في مصر" لدعم المراهقين*

بالنسبة لناس كتير جداً, طلاق الأب و الأم بيشكل مشاكل كتيرة سواء ده كان من سنين أو بيحصل دلوقتي.

عايزك تعرف\تعرفي إن مصر فيها أكبر نسبة طلاق في العالم, في زوجين بيتطلقوا كل 4 دقائق (أه والله) و ده وفقاً لإحصائيات مجلس الوزراء و الأمم المتحدة.

في سنة 2015 المحاكم المصرية إستقبلت 14 مليون دعوي طلاق و تطليق. دا في سنة واحدة بس!!

الموضوع ممكن يبان إنه صعب شوية, لكن ممكن عادي خالص تعيش حياة عائلية مستقرة مع وجود طلاق في العائلة.
هنقولك إزاي:

ليه بابا و ماما بيطلقوا؟

في العادة هما بيطلقوا بسبب إن في واحد منهم قرر إن معدش هيعرف يعيش مع التاني بسبب الخناقات الكتير اللي بينهم أو زعلهم مع بعض, أو ممكن يكون بسبب إن الحب اللي بينهم راح , أو بسبب إنهم بقوا بيحبوا حد تاني غير بعض
أو ممكن يكون بسبب مشاكل أكبر زي شرب المخدرات أو سوء المعاملة أو القمار.
و ساعات مبيكنش في أي حاجه من دي بس بابا و ماما بيقرروا إن كل واحد فيهم يعيش لوحده!

مش بسببك

تعرف إن معظم المراهقين بيشوفوا إن الطلاق بسببهم, لكن لازم تعرف إن الطلاق بيكون بسبب حاجة حصلت بينهم.

و أكيد مش بسبب حاجة عملتها أو حاجة معملتهاش.

معظم الناس بتحاول إنها تحسن من نفسها يعني زي إنها تقعد مع العيلة أكتر أو أنهم يجيبوا درجات أعلي أو إنهم يلتزموا في الصلاة عشان يصلحوا اللي بيحصل, بس نرجع نقول اللي بيحصل ده مش بسببك خالص ولا ليك دخل فيه.

الموضوع عبارة عن قرار شخصي لبابا و ماما.

هو الطلاق هيأثر فيا إزاي؟

لما هيطلقوا هتحس بتغير في مشاعرك , هتحس إنك مجهد و زعلان و مُحبط.

ممكن تشوف إن واحد منهم بيحميك من التاني, او حتي حد منهم يلومك في اللي بيحصل.

بص توقع إن لما يحصل كده إنك تعيش مع واحد منهم بس ممكن مش في نفس المكان اللي إنت فيه دلوقتي أو إنك تروج مدرسة تانية

أو حتي ممكن ياخد واحد فيهم حكم قضائي إنك تعيش معاه هو بس و تشوف التاني في الأجازات بس.

بالنسبة للفلوس و المصروف, من المتوقع إنهم يقلوا عشان مصاريف الطلاق و المحامين و المحكمة و النفقة و حاجات تانيه كتير, و ممكن بابا أو ماما مكنوش بيشتغلوا و يقرروا إنهم ينزلوا يشوفوا شغل عشان يصرفوا في البيت.

يعني أكيد واحد بيصرف لوحده مش زي إتنين كانوا بيصرفوا من بعض , عشان كده في حاجات كتير ممكن تنقص

ممكن معنتش تعرف تروح النادي أو تاخد نفس المصروف.

ممكن يبقي ليك "جوز أم" أو "مرات أب" و ممكن يبقي ليك أخوات جداد علي حسب بقا لو إتجوزا تاني ولا لأ, يعني ممكن تشوف عيله

جديدة خالص.

أعمل إيه عشان تعيش حياة سعيدة؟

1) خليك إيجابي:

ممكن تكون الدنيا سهلة لو بابا و ماما معدوش بيكلموا بعض نهائي, لكن ممكن تحصل خناقات بينهم.

اللي هتعلمه إنك هتطلب منهم هدنة كده يبطلوا اللي بيقلوه أو بيعملوه في بعض و قولهم ( عاوز نعيش مسترحيين شوية ممكن تعملوا هدنة بينكم لفترة بسيطة).

2) خليك ذكي و عادل :

لازم تزور الأتنين علي طول و تسأل عليهم بإستمرار متحسسهمش إن في حد واخدك من التاني.

ده هيخفف التوتر بينهم و هيحبوك أكتر.

3) إستفيد من اللي حوليك:

ممكن بابا و ماما يزوروا بعض الطلاق دكتور نفسي عشان يساعدهم في إنهم يعدوا المرحلة دي. 

مفيش مانع إنك تتكلم معاه و تقولوا عن اللي إنت حاسس بيه.

ممكن تتكلم مع جدك أو خالك أو عمك أو أي حد كبير عشان يساعدك إنك كمان تعدي المرحلة دي

أهم حاجة يكون شخص إنت بتحبه و بيحبك و بتثق فيه.

إهتم بالحاجات دي:

1) متتكلمش مع صحابك في تفاصيل الموضوع.

2) متتكلمش عن بابا أو ماما بكلام وحش حتي لو حد عملك حاجه أو عاملك بطريقة وحشه.

3) إسمع اكتر ما بتتكلم و إفهم الدنيا صح.

4) لو إنت الأخ|الأخت الأكبر متلعبش دور مش دورك و تحاول تشرح الموضع لإخواتك الأصغر.

__________________________________________________________

__________ _______ _________ _______ ______ _______ _______