22 حاجة لازم تعرفهم عن النباتيين

هننشر هنا اجابات بعض الأسئلة المكررة، من مبدأ “يمكن يتخمد يا حورية".

 لكن قبل ما ناخد وندي لازم تعرف ان النباتيين قبيلتين؛ vegetarians و دول لا مؤخذة مابيكلوش اللحوم، و vegans ودول بقى بعيد عنك وعن السامعين مابيكلوش لحوم وأي حاجة تمت للحيوان بصِله (بيض لبن زبدة زيوت حيوانية و...و... و.... ). انا هنا هتكلم عن قبيلة؛ الفيجيتارين ودوّل اللي أقصدهم هنا بلفظ "النباتيين”. استبينا؟
توكلنا على الله:

١- ايوه النباتيين مابيكلوش سمك حضرتك، السمك مش نبات، تخيل!
٢- لا النباتي مش مقضيها سندويتشات خَس، انت أكلك كله نباتي لو شلت من عليه ربع الفرخة اللي تعبك ده، والاكل المصري كله نباتي أصلا 
(فول - طعمية - كشري - محشي - الطبيخ بانواعه - رز - مكرونة - حلويات الخ)
٣- القرار اساسه صحي وأخلاقي
٤- اللي بيوفره النباتي من اللحمة مش بيصرفه على المكملات الغذائية. البروتين النباتي كفاية لجسمه، ثم ان هو بياكل بيض وممكن يشرب لبن، وبعدين مين قالك انه عامل كده توفير يا هندسة!
٥- لا النباتي ماقلبش هندوسي
٦- لا الحقيقة النباتي ماكفرش ومش بيحرم حاجة حلال
٧- لا مش بيحط شمع عيد ميلاده في حزمة فجل، ما شاء الله حضرتك ورثت ظُرف الست الوالدة كله
٨- النباتي مابيخدش مرتبه جَزر الحقيقة، مع انها فكرة لطيفة
٩- السمك مش نباتي والله!! 
١٠- الاكل النباتي مش ريجيم أو دايت، ده اُسلوب حياة، وممكن يتخّن عادي، حتى بُص ع فخاد أي نباتي. ناولنه بقى ربع البيتزا اللي فاضل هناك ده الله يباركلك
١١- النباتي مش بيحاول ينشر الفكرة ولا “يبشّر” بالنباتية، كُل اللي تحبه، اختيارك الشخصي يا فندم 
١٢- اه النباتي لسه بيصلي!
١٣- لا النباتي مش مفتقد الفراخ، ومش بيعيط في حضرة الستيك المشوي
١٤- حضرتك حُر!
١٥- اه النباتي لسه قرايبه بيزوروه 
١٦- اه النباتي لسه صحابه بيدخلوه بيوتهم، وبيقولوله يا ريت كل الضيوف زيك كمان
١٧- لا النباتي مش ندمان 
١٨- النباتي بيشبع اه 
١٩- حضرتِك حُرة
٢٠- النباتي ماما لسه بتحبه، بس مخبي على بابا!
٢١- شكلك نسيت يا خلبوص، السمك مش نباتي
٢٢- النباتي مش عارف اذا كان هيكمل كده طول عمره ولا لا، “never say never”. بس هو ماعندوش نية يغيّر دلوقتي
__________________جرب في مصر__________________

جرب في مصر: هتعرف بلغتك :)