إتيكيت الشات

أهم عشر قواعد للشات

القايمة دي بأهم عشر قواعد من إتيكات الشات, ممكن عادي خالص تعملهم شير أو تقولهم لإصحابك و لعيلتك:

1- القاعدة الذهبية:  

متردش علي رسالة بمكالمة, لأنه والله لو كان عاوزك تكلمه في الموبايل كان إتصل.

بعدين إتوقع نتيجيتين من مكالمتك دي : 1- إنه يرد عليك بس هيكون مخنوق من شطارتك الإجتماعية اللي هتقع منك في المكالمة.

                                               2- ميردش و تكملوا شات محرج.

2- قاعدة الرد:

دايماً رد ولازم ترد إلا في حالة واحدة: إنك عاوز تقطع علاقتك بالشخص ده. أه ساعات بتهرب من الرد عشان عارف إن الرد ده هيوصلك لمحادثة طويلة عريضة. بس معلاااش لازم ترد. وطبعاً لو إنت معنتش عاوز الشخص ده في مجموعة الFRIENDS عندك ممكن عادي خالص تتجاهله.

3- قاعدة اليومين:

لو هتاخد يومين عشان ترد علي رسالة توقع من اللي بعتلك إنه ياخد يومين برده عشان يرد, فمتتحمقش قوي لما يتأخر في الرد

و لو مش عاجبك الرد المتأخر ده, الحل دايماً في إيدك!

4- قاعدة التسرع:

لو اللي بتكلمه رد عليك بعد يومين , متردش عليه إنت في وقتها , خد وقتك

و القاعدة دي تطبقها مع الطرف الآخر خاصةً في مرحلة "التقلان" اللي في أول العلاقة.

5- قاعدة الرسالتين:

لو بعت لحد رسالتين و مردش أوعي أوعي أوعي تبعت رسالة تالته, كده الشخص ده خاصةً لو أونلاين مش عاوز يرد عليك "دلوقتي".

في واحد جاري كان بيقولي "دايماً في واحد محبوب أقل في أي علاقة و هو الطرف اللي بيبعت رسائل كتيرة و أوعي تكون إنت الطرف ده"

6- قاعدة متعلقنيش:

متبدأش مع حد شات لو مش ناوي ترد و تكمل المحادثة.

7- قاعدة الكسل:
و القاعدة دي في حالة إنك في شات مع بنت: متبعتش k  تلت مرات ورا بعض علي الأقل إبعت واحدة ok كاملة.

إشمعني مع البنات بس , عشان لو إنت بتكلم راجل و بعتهالك 100 مرة ورا بعض عادي يعني
مين عنده وقت يكتب ok أو okay أصلاًَ!!!!!!

8- قاعدة التجاهل:
متردش علي مكالمة جيالك برسالة, يعني تعالي علي نفسك و إبذل شوية مجهود و حسس اللي قدامك إنك مهتم و إنك عايز تسمع صوته و الكلام اللطيف ده.

9- قاعدة الغضب:
متبعتش الكلام كله و أنت فاتح "caps lock"  أو كله upper letters. ليه؟!
عشان بحس إنك مضايق كده و بتوترني و بتوتر المود بتاع الشعب كله.

10- قاعدة الباي باي
إتأكد يا إبن الحلال إنك خبصت الشات و كلكوا عملتوا باي باي لبعض
أوعي تسيب اللي قادمك يقول "روحت فين؟" أو "مبتردش ليه!" . قفلت المحادثة
دي فن محتاجة واحد برنس عشان كده محتاجة شوية تمرين.

__________________________________________________

TRY IN EGYPT || ETIQUETTE